Радыё РАЦЫЯ. Навіны. 29.11.2002, 17:15.

Сёньня ў Доме літаратара (Фрунзэ 5) адбываецца ўкраінска-беларуская літаратурна-мастацкая вечарына, зладжаная амбасадай Украіны на Беларусі, Саюзам беларускіх пісьменьнікаў і беларускім грамадзкім аб'яднаньнем украінцаў "Ватра". Ужо трэці дзень на нашай зямлі знаходзіцца дэлегацыя ўкраінскіх пісьменьнікаў, што прыбылі на супольнае сьвяткаваньне году кабзара Тараса Шаўчэнкі на Беларусі, а таксама 120-годзьдзя нашых народных песьняроў Я.Купалы й Я.Коласа. Культурніцкія стасункі дзьвюх суседніх краін, запачаткаваныя яшчэ ў глыбокай старажытнасьці, цяпер складаюцца на асновах незалежнасьці й нацыянальнага адраджэньня. З украінскага боку дэлегацыю ачольвае ляўрэат літаратурнай прэміі імя Шаўчэнкі Раман Лубкіўскі - прафэсар Львоўскага ўнівэрсытэту, перакладчык твораў Максіма Багдановіча й шэрагу славянскіх аўтараў. Беларусь творчую прэзэнтуюць Народны паэт Ніл Гілевіч, ляўрэаты дзяржаўнай прэміі імя Янкі Купалы Генадзь Бураўкін і Сяргей Законьнікаў, малады паэт і перакладчык Андрэй Хадановіч. У вечарыне ўдзельнічае амбасадар Украіны ў Беларусі Анатоль Дронь. Напярэдадні прайшлі сустрэчы ў амбасадзе Украіны, у музэях гісторыі беларускай літаратуры й М.Багдановіча, а таксама былі ўскладзены кветкі да помніка Тарасу Шаўчэнкі ў Менску. Заўтра імпрэзы завершацца ў мэмарыяльным музэі Янкі Купалы ў Вязынцы.